政情：挽留劉鎮漢不果 彭耀佳：唔夠劉太吸引

劉鎮漢原定七月底離任，但仍有部分工作要處理，延遲一個月先走人，佢話九月一定要走。點解？原來係佢喺多倫多工作嘅兒子要派駐海外半年，廿四孝嘅老竇掛住阿仔，一定要九月離任去探仔，唔可以再延長留低。

唔講你唔知，劉鎮漢固然唔簡單，任職總幹事十二年間，先後跟隨過三位旅發局主席、五位商務及經濟發展局局長同四位旅遊事務專員交手，為旅發局爭取到唔少資源。

搵繼任人選需時

至於佢嘅繼任人選搵到未？彭主席話透過公開招聘同獵頭公司搵人，需要一定程序，最後先畀董事會，但佢話應徵者眾，要揀選一位有番咁上下辦事能力嘅人係需要時間，至於會唔會最後請咗位外國人，佢就話請人無設限。