政情：游蕙禎拍片教「防扑」技巧
雖然政府已宣布修訂《逃犯條例》壽終正寢，但爭議持續，已引發連串衝突，程度可謂愈演愈烈，但就喺呢個風頭火勢，因宣誓風波被褫奪立法會議員資格（DQ）嘅游蕙禎，尋日就喺YouTube上載咗一條近五分鐘嘅短片，分享一啲簡易防身技巧，不過片中冇提到任何示威衝突，只係話近日治安差，有朋友街都唔敢出，所以教啲防身技巧應付「扑頭黨」咁話！
用衫布皮帶對付扑頭黨
游蕙禎分享嘅技巧都好簡單，主要用衫、布或者皮帶就做到，仲搵咗兩個蒙面人幫手示範，例如畀人用棍攻擊時，就可以用力揮動長衫或者布抵銷攻擊，至於揮動皮帶就可以喺無路可走、被包圍時嚇對方，務求同對方保持距離。及後仲提到一啲對方衝過嚟、被人捉住時嘅應對技術，仲話呢啲技巧比較複雜，可以的話就練習吓先。
不過，佢都講明分享呢啲技巧並唔係叫人用嚟攻擊人，只係喺危險嘅時候用嚟爭取時間逃生，最後希望大家都可以「安全行街、平安回家」。