政情:梁栢賢愛搞二次創作 收退休禮物多卡通畫像

醫管局行政總裁梁栢賢(PY)月底離任,佢曾經講過退休前會到各醫院向前線同事講拜拜,而佢尋日就喺Facebook上載咗張相,係醫院同事送畀佢嘅退休禮物,當中唔少係卡通畫像。點解?

據了解,PY每年會到全港四十多間公立醫院探訪兼同啲醫護人員傾偈,了解各醫院嘅設施同最新情況,由於佢作風親民,普通職員見到佢都會走過去一齊影相。適逢佢即將離任,唔少同事都依依不捨,送咗啲紀念相片同感謝卡畀佢,以記錄佢與同事之間嘅點滴,當中唔少係卡通畫像,可能因為佢喺每年嘅醫管研討會上都大搞二次創作,將自己個樣Key入圖,化身奇異博士、美國隊長同小智等卡通人物嚟製造氣氛有關。

話過要環遊世界 九月先去日本

PY喺Fb貼文話對佢哋嘅心意會銘記在心,並表達謝意,而好多網友就留言祝佢退休後生活愉快,開展人生燦爛嘅另一頁。PY曾經講過退休後會先去環遊世界,九月去一轉日本東京,十一月底去三個禮拜歐洲旅遊,要同老婆去芬蘭探聖誕老人同睇極光添!

第一手消息請下載on.cc東網iPhone/iPad/Android/Windows Phone Apps