中環出更：鄭松泰鄺俊宇突變hehe 惹網民熱議
立法會有一個「出櫃」嘅議員陳志全（慢必），近日又多咗對CP（Couple、情侶），民主黨（白鴿黨）嘅鄺俊宇（鄺仔）同熱血公民嘅鄭松泰（泰博）突變hehe，仲開咗網頁，講明係追蹤佢哋添！
鄭：玩吓無所謂
泰博尋日喺Facebook貼文同上載咗張相，話唔少網友講佢知，發現咗一個名為「為泰博鄺仔打call彈彈hehe團 」嘅網頁。而泰博話可能係支持者見最近好多朋友精神繃緊，希望大家笑一笑罷嘞！佢仲話「我有老婆有泰妹，應該唔會引起誤會，玩吓無所謂，只怕鄺神（鄺仔）唔高興」。泰妹？大家唔好誤會，泰妹係佢囡囡，唔係另一條女。
呢個Post出咗街，惹起網友熱議，毀譽參半。雖然泰博話有老婆同囡囡，唔係hehe，但有網民就話「有老婆都可以的」，甚至話「老婆只是掩飾！」擺明玩佢，亦有心水清嘅網友留言「玩吓唔係無所謂，呢個玩膠同當年金鐘hehe一樣，唔好畀佢發大。」仲記得一四年違法佔領行動期間，時任嘅學聯秘書長周永康同副秘書長岑敖暉，就係被塑造成hehe。
睇番網頁張圖，佢同鄺仔都笑得幾溫柔o架！唔少網友讚好襯，但亦有網友問「將你同佢放喺一齊，你有冇嘔？」亦有網友話「算啦……民主黨係鄺囝（仔）o架啦！唔通鄭松泰想揀林卓庭咩？」有網友就為鄺仔平反，話「鄺神（仔）同泰博個樣差咁遠，對鄺神（仔）唔公平。」
卓妮