政情：民建聯支部晚宴 網民踩場「贈興」
不滿修訂《逃犯條例》風波持續，矛頭轉為狙擊建制派。民建聯灣仔支部尋晚七點，喺銅鑼灣伊利莎伯大廈一間酒樓舉行會慶晚宴，有網民因不滿該黨而發起踩場「贈興」行動，約三十名戴上口罩的示威者響應號召，守候大堂高喊「民建聯最無恥」、「票投民建聯，香港玩×完」等口號，但未有進一步行動。
食物及衞生局副局長徐德義、商務及經濟發展局副局長陳百里，以及民建聯立法會議員張國鈞等亦有現身，據悉他們喺晚宴逗留一段時間後已離去。
日前已取消會慶酒會
其實民建聯嘅會慶並非首次被網民發起踩場，該黨原本打算喺本月九日舉行周年會慶酒會，但基於唔少網民聲稱會踩場，最終決定取消，為廿七年首次，其時聲稱係以賓客安全為先，唔希望引起不必要嘅衝突，否認係怕咗示威喎。當日就決定取消酒會，今次灣仔支部嘅會慶晚宴又唔怕衝突冇取消，一時一樣，都唔知邊樣先係佢哋嘅立場啦！