政情：陳淑莊周三做電療 左後腦傷口冇晒感覺
早前確診腦部有腫瘤嘅立法會議員陳淑莊（Tanya），接受腦手術後逐漸「復出」，尋日仲由兩個猛男保護下參加遊行。佢話康復情況幾好，本周三就會開始做電療，叫大家唔使擔心。
佢又自爆當初確診時，媽媽發脾氣以為係電子產品影響生瘤，要求掉咗屋企部微波爐，連手機都差啲失守，最後講句：「媽媽你都有用喎」，手機先得以平安。
依家不論影相定傾偈，Tanya都會頭耷耷，好似一個含羞答答嘅少女望住其他人。佢戲言手術後要做淑女，斯文啲，因為眼望嘢有疊影，斜斜哋先望得到，依家已經慢慢習慣咗嘞，最厲害嘅係已經可以上跑步機跑步，練番好體能。
咁醫生有冇制止佢活動？佢懶叻話冇，冇叫佢唔准行、冇話要戒口，又冇話禁運動喎。佢大讚醫生手勢好，個傷口唔算大，仲講笑話早知開多兩刀，拉貼塊面整吓喎，但傷口位置，即係左邊後腦切咗神經，傷口就冇晒感覺嘞！