政情：公民講場：限制多多 大打折扣 醫療券搵長者笨

政府推出嘅長者醫療券一直都係問題多多，之前就被社福團體及政團批評金額太少，近期又爆出有長者使用於視光服務時有濫用嘅情況出現。消費者委員會尋日公布嘅調查指出，市面上有長者身體檢查計劃唔接受長者使用醫療券。消委會總幹事黃鳳嫺就話，呢個情況對醫療券嘅用途大打折扣，認為醫療券係有金錢價值，有關機構冇理由唔收取醫療券，佢仲叫政府盡快處理應用醫療券嘅問題添。醫療券推出多年，唔少長者同坊間都對使用醫療券存有唔少疑問，食物及衞生局局長陳肇始真係責無旁貸喇。