政情：大埔區會開綠燈准討論修例
民主派反對修訂《逃犯條例》戰線蔓延至區議會。早前北區區議會、中西區區議會同灣仔區議會都有區議員提出動議，要求討論修例等事宜，不過北區區議會就否決咗納入議程，而中西區區議會同灣仔區議會亦都難以成事。大埔區議會日前就有議員提出相關動議，以為都係「凍過水」啦，點知新上任大埔區議會主席嘅黃碧嬌就「開綠燈」，話准許議員提出相關動議喎。
黃碧嬌：按規矩動議便批准
大埔區議會六名民主派區議員日前去信當區區議會主席黃碧嬌，話近日因修例爆出亂局，警方施放催淚彈同開槍，質疑當中可能有違規行為，要求警方出席下月舉行嘅區議會大會。黃碧嬌尋日就話，議員係按足規矩入動議，所以會依例批准，兼請秘書處聯絡警方，睇吓會派邊位代表出席。問到會否呼籲民主派冷靜討論，唔好搞事，佢就話區內反對派議員表達意見時都係理性嘅，可能建制派議員都會提出修正案，到時大家再喺會上發表不同意見，仲話區議會不時都會討論全港事務，冇規定一定要係當區事務先可以討論喎。