政情：議辦門外堆滿回收樽 徐子見憂惹居民投訴
東區區議員徐子見（Andy）嘅議員辦事處外堆咗一袋袋疑似裝垃圾嘅袋，究竟發生咩事。其實袋入面嘅並非垃圾，而係市民回收嘅膠樽啫。
近年環保風氣盛行，唔少市民都開始習慣將垃圾分類，部分屋苑同議員辦事處更會向區內「環保先鋒」派獎賞，Andy嘅辦事處亦會定期回收部分物資，但有啲熱心街坊晨早就將成袋膠樽放喺佢議辦門口，嚇到佢拿拿聲攞走，皆因驚畀人投訴喎。
呼籲街坊唔好阻礙通道
Andy喺社交網站發貼話，朝早議辦職員返工時，就喺門外發現幾袋不同類型塑膠樽，所以佢就再次呼籲，各位支持環保回收嘅街坊要留意，唔好將塑膠直接放置喺辦事處門外或回收車旁，阻礙通道，因為議辦職員或義工難以即時處理，擔心可能引起居民投訴。廢物回收係好事，但係要處理得好亦係一門學問，一早放喺門口難免引起其他人誤會，大家行多步，或者Andy放個箱喺門口可能可以解決問題喇。