立法會財務委員會上周五因民主派議員玩嘢，搞到原定時間為三個半小時嘅會議，喺開會一個多小時後就要提早結束，原本積壓嘅二十項議程都無法處理。而日前立法會網站就顯示財委會本周五將只有有關明日大嶼填海計劃嘅一項議程，惹來政府想將該議程硬闖財委會疑雲。據了解，政府並非無意將議議程「打尖」喺財委會審議，只係近期政治局勢緊張，政府惟有多一事不如少一事喇。
根據立法會網站財委會最新議程，有關明日大嶼填海計劃嘅中部水域人工島相關研究項目排喺原有二十項議程之後。消息指，政府未有要求財委會優先審議中部水域人工島相關研究項目，係因應現時政治局勢，擔心調動議程「打尖」審議，會再挑起事端。政府希望議員可以平靜啲咁去處理財委會原有嘅項目，所以就將有關議程按正常情況「排隊」喇。
雖然政府未有將中部水域人工島相關研究項目「打尖」，不過財會嚟緊嘅會議係咪就風平浪靜還要睇民主派。事關涉款接近二十四億元嘅元朗橫洲公營房屋發展計劃之工地平整及基礎設施工程項目亦即將喺財委會審議，真係隨時又變成另一個戰場。睇嚟財委會主席陳健波都係走唔甩，要嚴陣以待喇。