探射燈：暫緩修例 益晒張宇人林卓廷
立法會原於上周三大會就修訂《逃犯條例》恢復二讀辯論，但包圍立法會行動令當日大會取消，政府更宣布暫緩修例。立法會明日將再舉行大會，因政府已暫緩修例，其他政府法案又未排到上大會審議，以致明日大會出現冇政府法案嘅情況。有建制派立法會議員表示，依家呢個情況係益咗飲食界立法會議員張宇人（Tommy）同埋議員林卓廷（阿廷）喎，此話何解呢﹖
兩人議案大把時間討論
根據立法會大會議程，雖然明日大會冇政府法案，但就仲有傳召律政司司長鄭若驊等三項議員議案。而阿廷同Tommy就各有一項議案會喺下次會議處理。有建制派人士話，大會原定花兩次會議審議修例，即使修例如期通過，距離暑假休會只有兩次會議，阿廷同Tommy嘅議案可能凍過水，不過依家暫緩修例，相信就大把時間討論喇。
而Tommy議案係關於輸入海外醫生，早前醫務委員會已通過放寬海外醫生來港實習要求，令議案有啲過氣，由其他議員提出嘅修正案亦唔多，唔知到時個議案會否極速完成辯論喇。