中環出更：稅務政策組歸財政司 陳茂波乘機申開位
財政司司長陳茂波喺二○一七年政府財政預算案中宣布喺財經事務及庫務局之下成立稅務政策組，以全面審視同檢討稅務事宜，政策組喺同年四月成立，但成立唔夠兩年，陳就喺今年二月發表預算案時，宣布將政策組從財庫局轉移直屬於財政司司長辦公室。而陳茂波仲為咗咁向立法會申請於財政司司長辦公室開設一個財政預算案及稅務政策組主任職位，涉每年政府開支近四百一十八萬元添o架！
涉年開支共417萬
根據政府提交予立法會人事編制小組委員會嘅文件，呢位財政預算案及稅務政策組主任負責帶領財政預算案及稅務政策組，並督導相關日常工作，年薪開支為二百七十九萬三千元，薪金加埋員工附帶福利，每年涉政府開支合共四百一十七萬七千元。
政策組原本職責係審視同檢討稅務事宜，通過稅務措施促進產業發展，改善本港稅制同研究擴闊稅基以增加收入等。不過政府多年嚟喺檢討稅制同擴闊稅基方面都係得個講字，請多個人返嚟係咪會有改變，定係最終變成只係幫陳茂波手睇吓預算案有冇計錯數就要拭目以待喇。
卓妮