中環出更：擺脫限制感受自由 區紹堅教殘障者潛水
一般人學潛水或者都唔算太難，但對殘障人士而言可能難度就會倍增。尋日國際獅子總會中國港澳三○三區（總會）舉辦第三屆香港十大優質社會服務頒獎禮，表揚多間作出優質社會服務嘅機構。國際傷健潛水協會（香港）就憑訓練殘疾人士體驗潛水而獲獎，協會名譽顧問區紹堅話，潛水對於殘疾人士嘅生理同心理都大有裨益，因潛水嘅無重狀態有類似物理治療效果，亦可擺脫輪椅等輔助工具嘅限制，令殘障人士自由控制水中嘅活動領域，如考獲潛水執照，更會帶嚟無比振奮嘅成功感。
而該協會秘書丘志財就話，學習潛水嘅殘疾人士大致可分成智障、視障同肢體傷殘三類。由於要確保對方完全明白教練嘅指示，所以只會接納輕度智障嘅人士，至於視障人士目前可使用水底通話器學習，不過都必須學識觸感手語以防萬一。而肢體傷殘者其實只要透過訓練，亦可享受潛水樂趣，佢仲話，有肌肉萎縮症患者能夠喺水中懸浮，好似魚一樣，不過對方就花咗四年時間鍛煉先做到嘅。
盧俊賢帶殘疾者挑戰戈壁沙漠
另一獲表揚嘅非政府組織創辦人盧俊賢原本係金融從業員，十二年前佢參加咗撒哈拉沙漠馬拉松賽事，期間被參賽嘅殘疾人士嘅堅毅精神感動，後來佢就成立「極地同行」，並倣效當年喺撒哈拉沙漠嘅經驗，組織中學生同殘疾人士攜手走過戈壁沙漠一百公里。佢話，殘疾人士頑強面對挑戰，對健全人士而言係一種啟發喎。
於天橋底經營社區菜園而得獎嘅慈善機構「藝土民間」主席楊肇珊話，於天橋底開田墾地唔止係善用空間，亦可令城市人了解日常食用嘅農作物係如何生長。而該菜園嘅城市農夫吳藹思就話，喺天橋底種植會面對陽光不足問題，解決方法就係喺有較多陽光照射嘅地方種時令蔬果，陽光較少嘅就種香草喇。
卓妮