政情：八網難逃：沈豪傑同獎杯合照 網友：又喺度領功
經過兩個多月嘅激烈比賽後，第七屆全港運動會結束，最終元朗區成功衞冕全港總冠軍。再獲佳績，元朗區議會主席沈豪傑梗係勁開心喇，仲同一大堆獎杯合照，上載咗去Facebook添！之但係，呢張相就畀網友質疑佢邀功喎。
被質疑張相點解無健兒
沈豪傑喺貼文中仲不忘感謝各位教練同運動員嘅付出，仲有係元朗區議會同元朗區體育會嘅支持，為元朗爭光！又話班運動員係元朗人嘅驕傲。有網友留言多謝佢對元朗區運動員嘅支持，但有網友就話：「又喺度領功，你係運動員咩？」網友亦質疑「點解張相得你嘅？各位健兒呢？」
面對網友嘅質疑，佢即刻回應話「（啲相）因為不在我的相機內，要等大會send番畀我。」冇耐，佢就將好多張運動員嘅合照放上網嘞！咁做睇嚟係要證明自己冇邀功囉！