政情：莫錦貴險勝林奕權 當選鄉議局副主席
鄉議局尋日舉行換屆選舉，由大埔約、元朗約、南約各有一名代表出任主席同兩名副主席，當中兩個副主席位置都有競爭，以大埔約較為激烈，因為以前代表大埔約嘅前鄉議局副主席張學明退下火線，觸發三名鄉紳參選爭位，包括沙田鄉事委員會主席莫錦貴、大埔鄉事委員會主席林奕權及西貢北約鄉事委員會主席李耀斌，最終莫錦貴得五十八票，以一票之差擊敗取得五十七票嘅林奕權，當選新任鄉議局副主席。
查實張學明早前將大埔鄉委會主席交棒畀林奕權，外界一直盛傳連鄉議局副主席一職，亦屬意由林一併接手，然而，結果事與願違，林輸一票未能進身鄉議局領導層，至於另一名落敗者李耀斌只得二十一票。
一票之差 「冇諗過咁激烈」
莫錦貴接受查詢時話，選前對自己都有信心，但冇諗過競爭會咁激烈，不過結果係點其實冇乜所謂，形容大家都係自己人，都係幫新界人做事，最終贏到當然高興，佢表明未來會繼續跟進新界人關注嘅範疇，為新界人發聲。至於另一名鄉議局副主席係由南約代表出任，最終離島區議會前主席林偉強取得七十七票，力壓梅窩鄉委會主席黃文漢嘅六十票，成功連任副主席一職。