氯氣常洩唔簡單 利益輸送最可怕

港府冇神經、冇靈魂,做嘢唔係錯漏百出,就係踢都唔郁,之但係一講到私相授受、官商勾結咯喎,鬼打都冇咁精神,元神即刻歸位。呢嗱,尋日濾水廠又洩漏氯氣嘞,係短短七日之內嘅第三單,水務署監管不力、草菅人命唔在講,背後涉及嘅利益輸送先至最令人側目。

話說牛潭尾濾水廠氯氣儲存室尋朝早突然警鐘大作,員工急緊疏散,經調查後,懷疑加氯機房一條氯水輸送管出現穿孔漏出氯水,引致偵測系統發出警報並啟動保護系統,雖然最終有驚無險,但都嚇到一額汗。你知啦,氯氣屬刺激性有毒氣體,對人體有害,最大鑊係遇到化學反應會引致爆炸,年前河北化工廠大爆炸就係由此造成。唔怕一萬,最怕萬一,輸送管化學成咁,係咪質量有問題呀?當局係咪監管失職呀?若然下次成條破裂咪大劑?

當然喇,大事化小、小事化了不嬲係官老爺強項。水務署話喎,今次事故不影響供水及水質,仲強調與現場生產氯氣機組嘅運作無關,簡直無私顯見私。點解咁講?梗係喇,水務署位於牛潭尾及大埔兩間濾水廠嘅三項加設氯氣生產設施工程,三年前未經公開招標,就直接將合約批畀律政司司長鄭若驊老公潘樂陶嘅公司,價值過億元o架。今年初被傳媒踢爆,水務署仲死撐話合乎程序,點知話口未完就出事,再揭落去會唔會有更驚人內幕,邊個話得埋,幾歹落定閘先喇。

講真,牛潭尾濾水廠已經唔係第一次洩漏氯氣嘞,前年同舊年都發生過,舊年嗰次仲差啲爆炸添,但水務署每次都臭聞密冚,從來冇主動通報。喂,一次就話偶然啫,三次出事喎,年年洩漏喎,證明事不尋常,水務署唔向承辦商大興問罪之師,反而百般維護兼隱瞞,你話冇古怪都冇人信。唔通家陣嘅香港返番五、六十年代,權貴勢力大到可以隻手遮天,凌駕於人命安全之上?

真相可能真係咁黑暗。睇吓沙中線剪筋醜聞咪知囉,成件事擺明偷工減料,外資承建商責無旁貸,但莫講話港府事前冇監冇管,就連事後追究都係做戲咁做,邊有阻嚇力吖。鬼咩,洋公司有幾百億合約在手,大到不能倒,港府點止崇洋媚外咁簡單,最怕豆腐渣工程遲早倒下,市民隨時慘成「沙中人」、「兵馬俑」。

冇計嘞,回歸後話就話港人當家作主,實際上施政繼續向權貴同洋人傾斜,黑箱作業成為常態。淨係一件「僭建驊」咋,知法犯法、政治交易、放生漢奸、自我特赦乜都齊,連律政司都無法無天咯喎,其他部門唔有樣學樣至奇。