中環出更：蔡曉慧細個冇諗過做女飛魚
「我的志願」係細個讀書時必寫嘅題目之一，但長大後，理想同現實往往都有一段距離，呢個距離唔一定係壞事，就好似二○一四年傑青、前香港女飛魚蔡曉慧早前出席新一屆十大傑出青年選舉啟動禮時，講起自己從來冇諗過做運動員，寫「我的志願」都係求其寫，長大後成為飛魚真係無心插柳。唔怪得啲人成日話無心插柳柳成蔭啦！
蔡曉慧話，細個冇諗過做飛魚，更加冇諗過自己會成為傑青啦，細個根本冇夢想過將來做乜o架，嗰陣好多嘢都未接觸過，乜都唔識，「見得最多嘅係警察叔叔，咁老師叫寫我的志願，咪求其填警察囉」，時至今日，由退役運動員轉為游泳教練嘅佢，終於搵到自己嘅志願，就係要幫佢嘅學生達成願望，游出好成績，希望佢哋能為港爭光。
趙傑文想做醫生 怕血打消念頭
其實蔡曉慧都唔係單一例子，今屆評審團首席評審兼九九年傑青彭耀佳都話，讀書時代參加過紅十字會後，就立志將來要做醫生，繼續幫人，可惜最終成績唔達標入唔到醫科，不過佢一直都冇忘記過呢個心願o架，依家佢就利用喺商界嘅學識貢獻醫學界，例如之前做過醫管局成員，依家仲做埋瑪麗醫院醫院管治委員會主席添，都算達成半個心願咁話。
另一位前傑青、香港防止虐待長者協會主席趙傑文靜靜雞同卓妮講，細個立志做醫生，但後來發現自己怕血，念頭即時打消，另一個志願係要搵多啲錢，因為佢細個嗰陣，每日返學都見到好多乞兒好慘，忍唔住將自己嘅零用錢畀佢哋，後來發覺咁唔係辦法，幫得一個幫唔到第二個，就連自己都冇晒錢，所以立志從商，搵多啲錢先可以幫到更多有需要嘅人。唔知佢依家算唔算達成心願呢？
卓妮