政情：象哥做足15年議員唔知薪酬點制訂
好多立法會議員本身都有正職，只係兼職做議員，但每月九萬三千元議員薪酬仍袋袋平安，到底呢個價位係點樣制訂出嚟o架呢？立法會議員酬金及工作開支償還款額小組委員會尋日開會，委員會主席黃定光（象哥）都坦言，自己由二○○四年入職至今（即係做咗十五年議員），都唔知點解係收咁多錢喎。
話陳維安份糧或畀晒老婆管
委員會尋日討論下屆嘅議員酬金及工作開支償還款額檢討，象哥話議員薪酬可能同大家有利益衝突，相信唔會有議員想傾，建議忽略唔使討論。點知議員譚文豪就話唔尷尬，下屆仲有幾多議員坐喺度，或是有幾多人會繼續選都係未知之數，問及當初係點制訂議員薪酬基準？象哥就明言自己唔知，想將個波交畀在席嘅立法會秘書長陳維安回應，但諗諗吓發現陳維安仲遲過佢入職，應該都未必知。委員會秘書就話每屆都有檢討報告，係根據一籃子因素去考慮嘅。
譚文豪之後狂質問陳維安出緊幾錢人工，問到係咪多到數唔到？陳維安一直支吾以對，象哥終出口解圍，話陳可能將份糧交畀太太管，所以咪唔知囉！據資料顯示，秘書長屬於首長級第六級，月薪高達二十六萬多元。