中環出更：陳茂波落區遲到 婆婆大呻等好耐
政府舊年公布派發四千元搞到連番混亂，經常被斥擾民低效，搞到財政司司長陳茂波（波叔）尋日落區都遇上請願，遲咗少少嘅佢仲畀婆婆當面問「依家幾多點呀？」
波叔尋日到訪葵青區議會，大約四十人喺葵青區議會所在嘅葵興政府合署外等，準備親自向佢表達意見，當中不乏年紀老邁嘅長者。而波叔就遲咗五分鐘，搞到有婆婆唔耐煩，當面話佢遲到，仲大呻等咗好耐囉，佢唔知係咪唔好意思，親自接收所有請願信，先行入去政府合署喇！
請願者斥派$4000安排混亂
有請願人士批評計劃籌備多時但安排混亂，唔知幾時先拎到四千元，真係聽到都感受到有幾心灰意冷。更有請願人士要求政府簡化派錢程序，盡快派發四千元，甚至建議派多三千元以平息市民對連番混亂嘅怒氣添！
另外，有請願人士不滿政府動用公帑，發展「明日大嶼」填海計劃，批評波叔胡亂動用金錢，猶如倒錢落海，亦有請願人士要求增設長者牙科門診、實報實銷牙科津貼、增加醫療券同取消累積上限。
卓妮