中環出更：鄧家彪就嚟再做老竇 缺席勞工大會伴妻
勞工顧問委員會勞方委員鄧家彪（阿彪）就快又做爸爸啦，佢早前喺工聯會「五‧一」國際勞動節酒會上自爆，第二個小朋友將會喺六月出世，係囝囝嚟嘅，同大女相隔十年，證明寶刀未老！佢話原本要出席日內瓦國際勞工大會，但因為太近預產期，所以今年唔會出席，因為太太最重要。
阿彪話以往日內瓦國際勞工大會喺五月舉行，原本都十五十六，唔知去唔去好，今年係一百周年推遲到六月舉行，雖然有機會見到好多國內外嘅政要係好難得，但都決定唔去，預備入產房陪太太。被問及係意外定有計劃生第二個小朋友呢？佢就話總之係好事、開心、驚喜，已經收咗二手嘢畀BB，夠晒環保，至於大女有得升職做家姐，覺得好開心添！
麥美娟笑言自己係「大姑奶」
同場工聯會（工記）嘅兄弟姊妹都開始諗定禮物送畀BB，立法會議員麥美娟（Alice）就最實際，話個個生BB都會送封大利是，笑指自己係「大姑奶」，仲大爆工記二代已經有「三角戀」，佢個姪女好鍾意另一立法會議員郭偉強個仔，有次一路玩一路餵郭個仔食啫喱，你一啖我一啖咁，勁sweet；至於荃灣區議員葛兆源個仔就好鍾意佢個姪女，有次Alice抱住姪女，葛兆源個仔仲鬧佢要放低，自己要同佢玩。郭偉強就話「三角關係，我哋做老人家嘅邊管到啫」，由佢哋自由發揮喎，如果第時姐弟戀，佢都開放態度嘅。聽起嚟成班小朋友真係勁可愛。
工聯會榮譽會長林淑儀都有兩個仔女，細個都有爭嘢玩，總之邊個曳就罰邊個多啲，乖啲就錫多啲，依家兩個都大個晒，孫都有三個啦！
卓妮