政情：公民講場：議員罵戰鬥粗俗 立法會變菜市場

雖說立法會係一個莊嚴嘅地方，但近年議會就被指質素每況愈下。尋日立法會內務委員會討論一個法案委員會開會事宜，點知就搞到好似街市咁，先有民主派議員用「下流賤格」批評內會主席李慧琼（Starry）被逐出會議室，之後再上演一輪口水戰。過往已多次會上鬥嘴嘅民主派議員黃碧雲（一舊雲），再同建制派議員蔣麗芸（Ann）上演罵戰。一舊雲不滿Starry主持會議手法，仲破口大罵︰「李慧琼垃圾！」Ann作為Starry嘅黨友亦都反攻，指一舊雲係「肥婆黃碧雲」，席間仲有人叫一舊雲「收皮」同「食屎」。議事堂瞬間變成菜市場咁，真係成何體統呢？立法會畀人批評為「垃圾會」都係議員自己咎由自取喇。