政情：黃家和囡囡搞新意思 餐廳開埋瑜伽班
香港人工作忙、生活壓力大，好多提倡健康減壓嘅產品都大行其道。香港餐飲聯業協會會長黃家和近日同女兒Kelly一齊出席活動。
去峇里島學整生機素食
Kelly講起自己喺加拿大已經考咗瑜伽教練牌照，雖然喺香港冇教人，但幫爸爸手搞餐廳時，都搞吓新意思，開咗間賣健康食品嘅餐廳，周末喺餐廳入面搞埋瑜伽班，真係多諗頭。
Kelly話，其實睇中香港開始有Raw food diet（生機素食）嘅風氣，自己喺屋企一向都會食呢啲健康食物，仲去咗峇里島、泰國等地睇吓人哋點整，再帶返嚟香港發展。佢又話，呢啲食物唔使特別煮，一開頭都係自己整畀員工睇，員工試過都覺得簡單又好味。佢話自己雖然唔係食純素，但一周有兩日唔食肉，而佢明白健身嘅人，要出街買健康嘅嘢食都唔係周圍有，所以餐廳會提供純素食物、蛋奶素食物、只食海鮮同蔬果嘅pescatarian，亦有啲食物係有肉，多種選擇，方便啲對健康有要求嘅人咁話。