政情：傳愛到高雄 陳念慈助雙失少女重返社會
最近台灣高雄吹起一股「韓流」，令外界特別關注呢個被稱為「南都」嘅城市。香港台灣婦女協會會長陳念慈(Nancie)話，往年婦女會都會向家鄉弱勢團體伸出援手，今年就決定將愛傳到高雄，將去年已籌到嘅善款，用於幫助高雄嘅失婚或失業少女重返社會，遲啲就會專程去篩選受助機構喇。
將辦慈善藝術展籌款
去年Nancie接任協會會長之後，即瞓身凝聚姊妹力量，今年十一月仲會舉辦慈善藝術聯展，義賣來自香港、台灣及澳洲嘅藝術家嘅作品，屆時會考慮將善款一併捐去高雄。
Nancie本身係免疫遺傳學專家，亦係美國註冊健康管理師，依家做埋健康管理顧問。講起健康管理，隨着手機普及化，眼疾有年輕化趨勢，Nancie就話，想護眼就要食多啲紅色蔬果，例如紅椒、紅菜頭、士多啤梨及車厘子等，紅蘿蔔或番茄攪汁時就最好加啲橄欖油，順口好飲之餘，屬於脂溶性嘅營養素先至更加容易被吸收喎。