政情：張華峰慶生 黨友送蛋糕玩食字
有「肥老闆」之稱嘅金融服務界立法會議員張華峰，每年生日都有黨友同佢齊齊慶祝，今年亦都唔例外，其黨友、商界立法會議員林健鋒（Jeffrey）仲有生日蛋糕「打孖上」，送上分別寫有「峰衣足食」同「股票峰收」嘅蛋糕，大玩「食字」，果然有肥老闆心。肥老闆已經噸位十足，食咗呢兩個蛋糕會唔會再增磅o架？
林健鋒話謝偉俊遲早入黨
尋日肥老闆獲多名黨友為其慶祝生日，都係其黨友嘅立法會主席梁君彥更特登趕返立法會同佢慶生同食蛋糕，實行遲到好過冇到。
肥老闆吹蠟燭前大問邊個食煙，原來係要搵火機點蠟燭，此時人人目光都聚焦喺立法會議員吳永嘉（Jimmy）身上，不過Jimmy就搖晒頭話加熱煙冇火，搞到要搵其他議員辦事處職員求助，真係搞笑。
教育局局長楊潤雄尋日都在場，充當攝影師之餘仲非常投入。同屬建制派嘅立法會議員謝偉俊（Paul）經過時都被人捉埋一齊慶祝，Jeffrey仲笑住話Paul遲早都要入黨。唔知此話有冇玄機呢？