政情:易攜帶清腸胃 周樹堂研製沉香水

「沉香大王」周樹堂(Stephen)擁有家族收藏近一個世紀嘅沉香,多到令佢一心想推廣沉香普及化,令一般市民都可以享用沉香嘅好處。最近佢又有新搞作,同一位喺香港做開飲用水嘅好朋友,成功研製咗一款沉香礦泉水。佢笑笑口話原本自己間唔中會煲沉香水飲,依家連呢啲功夫都慳番。

Stephen話,雖然佢成日教人話沉香作為飾物可以佩戴之外,呢種材料仲可以煲水嚟飲清腸胃,但係沉香係野生嘅,可能有菌,驚人哋飲咗唔舒服。今次同正規水廠合作,經過提煉同通過所有檢驗標準,個心就安樂晒。依家佢出外公幹,隨身帶幾支,不知幾方便。

常捐出佛像畀慈善機構拍賣

講開沉香,佢一向鍾意形態自然嘅擺件多過雕像,但一般人就更加喜歡佛像。佢笑稱自己有時見到靚雕像都會忍唔住收藏o架!過去幾年佢就經常捐出佛像畀慈善機構拍賣,有時價值五萬元可以叫價到五十萬元,無論慈善機構或競投嘅人都開心。

第一手消息請下載on.cc東網iPhone/iPad/Android/Windows Phone Apps