政情:一半人工租樓住傅曉琳呻貴

香港地少人多,租金愈來愈貴,長期做「租租」都幾難捱。新民黨小花、離島區議員傅曉琳(Sammi)都係租租一族,佢話每月要用一萬五千多元租東涌樓住,佔咗佢區議員薪酬約一半,真係覺得好貴,而租金水平同部分市區差唔多,但方便落區就冇辦法喇。Sammi仲話,父母住喺北角,都覺得佢住得太遠,所以唔會入東涌探佢,但佢就要由東涌出北角探父母,每次都覺得車程好甘。

落區識得搽防曬

Sammi早前出席一個活動,着住一條通花背心裙現身,真係相當搶鏡,令人眼前一亮。佢話,夏天間中都着背心,但以前點都唔會搽防曬,好彩未試過曬到甩皮,但夏天落區就曬到個人好黑,試過返到黨總部,啲人以為佢去完旅行,先知道自己真係黑咗好多,所以依家落區識得搽防曬。

第一手消息請下載on.cc東網iPhone/iPad/Android/Windows Phone Apps