政情：王憓創都市二胡音樂 助緩低落情緒
香港二胡藝術中心主席王憓（Ray）最近專心創作，唔講唔知，佢已累積咗二百幾首作品，仲被日本二胡研究者稱許為可能係世界上最多產嘅二胡樂曲創作者添。
Ray話，香港人因忙於搵食、生活節奏太快而冇欣賞二胡嘅閒情，依家連內地都有向香港「睇齊」嘅趨勢，反而日本仍有好多二胡知音。有日本二胡研究者就研究過佢嘅創作，將佢所寫嘅別具一格嘅音樂稱為「都市二胡音樂」，話係創立咗二胡樂曲新樂種、新風格，特別適合生活繁忙、壓力沉重嘅城市人聆聽，甚至有助於治療失眠及低落情緒喎。
希望寫出傳世之作
以為Ray聽完人哋咁評價會好開心？佢笑笑口話唔係，因為佢一心想寫啲足以流芳百世嘅藝術音樂喎。講起創作，靈感同環境都好重要，喺香港咁嘈雜嘅城市創作都難唔倒Ray，佢仲話特別鍾意寫啲令人聽完感覺寧靜嘅樂曲添。創作之外，Ray都有公開演出，最近就啱啱完成與兩位嚴重視障嘅兄弟一齊舉行嘅音樂會，希望鼓勵到年輕人追夢咁話。