政情：孫秉樞曾為幾個女友 畢業樂不思港
有「鐘錶大王」之稱嘅香港鐘表業總會永遠名譽會長孫秉樞已年過九旬，但睇落依舊有幾分帥氣，原來那些年佢曾經為咗「幾個女朋友」留喺內地，唔願返香港同屋企人團聚。
孫秉樞話其父親當年有遠見，早喺佢中學畢業時已經話香港將來要北望神州，所以佢畢業後放棄考香港大學轉投內地，隻身去上海讀書。佢又話，當時孤家寡人上到去，人生路不熟，幸好讀書成績好，有時教吓同學，受到一眾同學青睞，大家都好照顧佢，最後同幾個女仔拍拖。到畢業時爸爸叫佢返香港團聚，佢都因為唔捨得班女朋友而唔想走。
愛名畫多過錶
佢又提到，當時坐大洋船返香港好貴，冇錢返嚟，拖咗好耐，最後上海有間公司想到香港擴展業務，就帶佢返嚟，不過做做吓佢去洋行見工，最終踏入鐘錶業之路。不過，佢又笑稱自己做嗰行厭嗰行，愛名畫多過愛錶，最近幾幅愛畫喺賣咗後又升值，不禁呻笨，佢仲話以後咩價都唔再賣喎。