政情：科技便利 仍需苦幹 朱惠靖要學生人手做衫
科技日新月異，唔少行業都應用新技術幫助發展，但香港高等教育科技學院環境及設計學院設計學系副教授朱惠靖就仍然堅持學生要學習人手做衫。咁樣會唔會追唔上時代步伐（口架）？
朱惠靖就分享其個人經驗，話當年去英國升學，出發前知道英國買衫貴好多，所以就一手一腳做咗幾件衫帶過去，又話以前唔少人都係由買布開始，裁剪、設計絕大部分工序都係靠人手，唔似依家可以用電腦繪圖咁方便。
認為要練好基本功
不過方便還方便，佢始終認為人手做衫先可以鍛煉好基本功。難怪佢會堅持要學生學識人手製衣喇。
社會上有批評指新一代學生態度欠佳，不過佢就唔認同，因為讀設計需要熱誠，每次做衫都要由零開始，冇熱情都唔會讀呢科咁話。而佢當年都對設計好有興趣，當時家境難以負擔昂貴嘅時裝雜誌，佢就去圖書館同書店打書釘。果然係充滿熱情噃。