政情：施俊輝考公開試 用卡通收音機
相信喺香港應考過公開試嘅話，都一定有用收音機應考聆聽卷嘅經驗，尤其對錄音嘅背景音樂英國民謠《綠袖子》印象深刻。曾係會考十優狀元嘅教育局局長政治助理施俊輝（Jeff）自爆當年做考生時帶過一隻好出名嘅卡通貓公仔收音機去應試，唔通佢諗住可以出奇制勝？
帶定兩部入試場
Jeff話，當年考公開試冇人會去「擾敵」，即係好似依家啲考生咁拉長天線、用攻擊型收音機等干擾其他考生。佢當時都只用普通收音機，不過就會帶定兩部入試場，將其中一部作為後備，佢所講嘅嗰部卡通貓公仔收音機係後備用，仲係問妹妹借嘅添。
佢又話，當年成日都聽收音機節目當娛樂，所以考試時對用收音機並唔陌生，同呢一代嘅考生可能有分別。而佢都聽過考生對使用收音機應試有意見，但佢就話考試安排要交番畀考評局思考喎。佢咁講唔怕畀人話推卸責任？