政情：屯門區會唔畀攝錄 區議員批落後
屯門區議會上月初討論「明日大嶼」填海計劃期間，有團體一度直播會議而被秘書處阻止，最後搞到要報警處理。原來目前公眾人士唔可以喺屯門區議會會議上攝錄，事後該區區議員譚駿賢、甄紹南等認為呢個限制已不合時宜，喺尋日財務、行政及宣傳委員會上提出取消有關限制，但有其他區議員擔心取消後會出現秩序問題，結果搞到要成立非常設工作小組慢慢討論。
建制民主派都撐撤限
譚指，其實唔止民主派區議員支持取消限制，部分建制派都支持，有部分區議員就關注取消限制後，在固定採訪區可能影唔到部分議員的正面樣、閃光燈造成滋擾等問題，先搞到要開工作小組從長計議。佢仲話現時十八區區議會，只有屯門同東區唔畀公眾人士影相直播，可見冇必要再限制公眾人士。甄就擔心今屆任期得番約半年，開工作小組或會傾唔晒，有必要盡快取消有關限制。
會上仲有商議由屯門區議會秘書處提出將大會會議紀錄，由不記名改為記名，原因係其他十七區區議會都記名，希望可以睇齊，但有區議員擔心秘書處工作量大增，區議員亦會因此爭相發言而影響會議進度，結果否決咗個議案。如果係咁，點解其他十七區區議會記名又冇問題呢？