政情：王庭聰湊埋孫女出席活動
香港工商總會主席王庭聰涉獵範圍眾多，早排沙田區有個地區活動，身兼活動委員會會長暨名譽會長嘅佢，就非常善用時間，帶埋孫女去享受湊孫樂。
王庭聰當日要參加活動閉幕禮，大仔王槐裕都有到場，事關佢都係委員會副主席。而佢哋兩父子都要出席活動，自然唔可以缺少孫女，所以一行人特登早幾個鐘同孫女玩攤位，三代同堂現身真係羨煞旁人喇！
七月再添兩龍鳳胎外孫
平時工作忙碌嘅王庭聰就話，周末有時間都要分配畀家人，同佢哋行吓都好，而佢今年七月再會增添兩名外孫，會係一對龍鳳胎，一次就多個好字喎，睇嚟佢屋企將會更加熱鬧喇！