政情：沈祖堯掌環運會 唔識用環保飲管
中文大學前校長沈祖堯早前接任環境運動委員會（環運會）主席後，尋日返母校皇仁書院幫手介紹下星期五、六嘅開放日，當日會賣環保飲管、毛巾同可以減少用遮袋嘅「反向傘」。點知沈祖堯攞起支不銹鋼環保飲管就唔識用，仲將幼飲管放入粗飲管，好似想駁埋一齊咁，後尾要大家教佢先知係分開用，原來佢係首次見呢種飲管喎。
環境局局長黃錦星同環運會前主席林超英成日鬥電費少，沈就話自己「冇得鬥」，黃、林二人「天冷都沖凍水涼，我搞唔掂」，太太幫佢交電費，所以佢都唔知幾多錢，但屋企都較少開冷氣，有時仲會因而同家人有爭拗，有時家人剛開完，佢就關，而平日都會盡量環保啲。
講起環保同衞生之間會唔會有好多衝突，沈就話自從沙士後，醫護人員着多咗好多保護衣物，又用多咗好多口罩，例如自己每日做好多胃鏡腸鏡，就算每日做十個，每做完一個個案就要跟指引丟一件保護衣物，即係每個個案要丟四件，覺得好浪費，仲同過護士長爭拗，「我真係做咗幾廿年都冇事喎」，質疑如果冇埋到枱、冇接觸病人，係咪真係要咁丟呢？覺得「如果冇國際指引，就可以慳啲。」