政情：葉劉唔認老「字典冇退休二字」

點解突然咁講呢？其實葉劉日前喺社交網站Facebook貼文，話出席咗一個分享會，同場仲有安老事務委員會前主席梁智鴻（金刀梁）、立法會秘書處前秘書長吳文華女士同人稱「AO歌王」嘅中華廠商聯合會行政總裁楊立門等做主講嘉賓，探討點樣面對生老病死。

葉劉話有人問過佢幾時退休？佢話同金刀梁一樣，佢嘅人生字典中冇「退休」二字，因為由當年退下保安局局長火線後，跟住成立智庫至今，一直都好活躍，而呢種動力係嚟自工作帶畀佢滿足感同使命感，佢亦唔覺得自己衰老，死亡對佢嚟講，仍然好遙遠。

仲話長者應注重打扮

提到保養，佢認為長者係應該注重打扮嘅，仲叫「老友記」唔需要刻意扮年輕或過分追求潮流，只需作出適合自己風格嘅打扮同衣着，順眼自然就得嘞！