政情：選舉策略錯誤 姚松炎再致歉
前日係立法會四席補選一周年，有上咗位嘅議員喺社交網Facebook貼文講感受，而喺九龍西補選落敗、事後被外界狂轟選舉部署差同「堅離地」嘅立法會前建築界議員姚松炎，尋日亦喺Facebook貼文，再次為落敗同選舉策略錯誤向選民致歉。都係嗰句，早知今日，何必當初。
敗選之後，以前喺中大地理與資源管理學系做副教授嘅佢亦重操故業，喺中大同港大兼職教書，佢話因為學界嘅朋友見佢好得閒，所以先搵佢返去教書，順便賺吓外快，但係中大教嘅就轉酒店旅遊及房地產課程喇！其實，依家佢亦出任議員朱凱廸嘅政策幹事以及新民主同盟議員范國威嘅政策顧問。
眼疾不定時翻發
仲記得佢喺初上任議員時，就因為眼疾，所以右眼一直發炎同流眼水，有時要戴太陽眼鏡示人，事隔兩年幾，好番未呢？早幾日見到佢，佢話醫生話佢已經康復，但依家會不定時翻發，有時隔咗兩個月都冇事，有時就幾日就發炎流眼水。雖然醫生話好番，不過都好彩有開到啲眼藥水畀佢，等佢隻眼翻發時可用眼藥水紓緩吓喎。