政府打算斥資二百億元買六十個物業，用作社福設施惹來官商勾結爭議。勞工及福利局局長羅致光尋日就喺網誌解畫，話政府冇「魔術棒」即時變出社福設施，置業只係短期策略，而且早喺九五年都試過，位於灣仔胡忠大廈嘅社署總部都係咁買返嚟。老實講，社福設施需求一直有增冇減，廿幾年前要買物業就足以證問題一直存在，如果長期以來政府有做好規劃工作，今時今日又使乜要用魔術棒呢？羅致光與其用歷史解畫，不如醒醒定定，度吓點樣做好規劃仲好喇！
