政情：胡劍江手臂植晶片 方便測血糖
香港人只要出世時登記出生紙就得，毋須好似寵物咁植入晶片，不過早前見到香港鑽石總會副主席胡劍江（Micheal），佢就話自己都植入咗晶片喎，到底有咩作用？
避免頻繁篤手指
Michael喺右手手臂植入晶片，只要將一部細小儀器拍埋，唔使幾秒已得出數值，講嘅其實係血糖指數喇。佢話用晶片測血糖，可以避免傳統頻繁篤手指嘅痛楚。正所謂十指痛歸心，都唔難理解嘅。佢仲話自己只係做試驗，因為如果好用就會畀媽媽一齊用，認真孝順。
Michael笑笑口強調，自己身體並無問題，落力監察血糖只係為健康着想，大家唔使擔心。早兩日佢出發去北京開會，行李之中仲包括泳褲，話一有時間就會去游水做運動咁話。由於有太多文件要睇，佢仲帶埋一盞LED枱燈添！