政情：尹兆堅食完基層茶禮 話要開火轟陳帆
基層生活困苦，簡單如衣食住行都係考緊佢哋生活智慧。明愛青少年及社區服務關注住屋權益工作小組尋日舉辦「街坊廚神•劏房尋」煮食比賽，有來自多區街坊模擬喺劏房煮飯，評判之一嘅立法會房屋事務委員會副主席尹兆堅（肥尹）邊睇邊憶述畢業後住喺劏房嘅日子，街坊就反映廚房同廁所共存嘅苦況。
比賽嘅餸菜包括名為「苦中作樂」嘅苦瓜炒蛋、「辣味人生」嘅辣椒炒肉、「擠擠迫迫」嘅炒五花腩，肥尹聽完介紹就密密食，評分時話輪候公屋對議員嚟講係政策，對市民係生活，會幫大家繼續追過渡性房屋，兼且明言食咗大家「茶禮」，之後對運輸及房屋局局長陳帆都唔客氣，開行火追訴求。
太太生日 被冧掂到場
此外，尋日係肥尹太太生日，佢冧掂太太帶埋一對仔女到場，肥尹不停同仔女介紹基層生活係點樣。問到老婆冇怨言咩？佢就笑話「你又知冇？」只係怨到習慣喇！