政情：理大風波 字眼激進 時間倉卒 泛民聯署唔齊腳

最近理大宣布懲罰四名學生，當中有部分人被勒令停學同埋退學。民主派議員日前出嘅聯署，就認為學校處分令人遺憾同埋憤怒，仲話即使四名學生有任何錯失，本意係在於維護民主牆嘅言論自由，校方強行打壓亦唔可能聲稱喺事件中毫無責任，呼籲理大校方從速撤銷學生懲處。十四名簽署嘅議員包括楊岳橋、朱凱廸等，不過聽聞有部分泛民對撤銷懲處嘅訴求有保留，所以唔肯簽。

黃碧雲話政黨難介入

我哋問過幾位冇參加聯署嘅泛民議員，依家仲喺理大教緊書嘅白鴿黨黃碧雲就話，該黨已經出咗聲明，覺得理大懲罰過重，希望理大重新審視個案同埋收回決定。佢又話，其實冇人知道紀律委員會嘅內容，作為政黨好難去介入事件，要尊重番學校嘅專業判斷，所以只能作出勸喻，希望幾個學生都可以減到刑。

同樣冇簽聯署嘅葉建源就話教協已出咗聲明，認為校方處分過重，應該要以教育使命為原則，重新考慮四名學生嘅處分，同埋進一步解釋判決，交代處分嘅原則同埋理據。而佢個人就覺得睇唔到教育機構有需要用咁嚴厲嘅方式去懲處學生。

張超雄李國麟簽唔切

至於張超雄同李國麟都話太忙簽唔切，但立場同民主派一致。而因為倒插五星旗而惹上官非嘅熱血公民鄭松泰，本身都喺理大教書，不過就喺官非後不獲續約。過去民主派都會搵埋佢聯署，但今次就冇人搵喇。

消息人士稱，亦有人因為份聯署字眼太激而冇簽到。如果大家事前溝通得好啲，就唔使得小貓三、四隻咁冇氣勢啦，睇嚟民主派真係要檢討吓喇！