中環出更：「夠鐘起身走」李國麟辭任公大院長
衞生服務界立法會議員李國麟（Joseph）本身亦喺公開大學教咗廿幾年書，近年仲出任埋公大護理及健康學院院長一職，但原來佢早喺上個月就向公大請辭，接受查詢時就話辭職原因係覺得「夠鐘就起身走」，仲話依家公大護理系有成三千幾個學生，以護理系嚟講係全港最大，覺得自己都對得住公大咁話。
Joseph話上年先同公大簽約四年，自己今年已經六十歲，覺得過咗一年院長癮，係時候夠鐘要起身。由於佢辭職要六個月前通知，所以會繼續喺公大做到八月中。
咁突然辭職，係咪因為工作太忙？佢就話咁多年嚟都係「打三份工」，要兼顧大學、立法會同埋香港護士協會嘅事務，所以唔關事。至於被問到係咪身體出現毛病，佢就話「Touch wood啦」。
立會選舉「下屆先算」
下年就到立法會換屆選舉，被問到會唔會連任，Joseph就話下屆先算。其實Joseph時不時都打開口牌話要退休，不過最後都係書照教、議員照做。今次突然辭職唔撈，唔通佢真係下定決心要退位讓賢？
卓妮