中環出更：皮草來源唔人道 張雅麗冇再入貨
環保意識抬頭加上道德觀念改變，社會上對皮草嘅質疑愈嚟愈大，更有民間團體上街要求政府立法禁售。港島區婦女聯會（聯會）主席張雅麗亦擁有幾件皮草，不過係老公好多年前買落嘅，當佢發現皮草嘅來源並不人道，就已經再無添置。加上近年香港幾乎已冇嚴寒天氣，着皮草嘅機會好少，所以佢覺得皮草嘅需求會自然減少，立法禁售嘅迫切性唔高喎！
張雅麗又話，依家好多高科技紡織物料嘅保暖性能都唔錯，譬如人造皮草無論外觀同禦寒效果，都同真皮草相差無幾。若果時裝品牌相繼棄用真皮草，從而帶動消費潮流，犧牲動物以獲取人類華麗外觀嘅做法自然會式微。
吳丹怕凍着羽絨保暖
聯會會長吳丹都覺得着皮草已不合時宜，所以數年前已經唔再買，但係佢好怕凍，要着羽絨先至夠暖。不過製造羽絨時取用鵝毛嘅手法都好殘忍，佢話惟有唔追時款，盡可能着多幾年。香港廣西賀州市同鄉聯誼會婦女委員會副主席彭舜玟係素食人士，早已同皮草絕緣，對於有指反對皮草貿易人士或團體嘅示威手法似乎過激，佢認為若非如此未必可以喚起社會大眾對動物權益嘅關注，只要唔對他人構成傷害，都可以包容嘅。
講起着衫，中西區區議員楊哲安都試過買衫畀太太，不過僅只一次。事關佢買嘅係西班牙足球勁旅皇家馬德里嘅波衫，自己同太太各一件，仲齊齊以情侶裝嘅姿態到迪士尼樂園放閃。誰知事後太太同佢講，其實唔需要買呢件波衫。既然太太唔領情，自此佢就無再為對方買衫啦。
卓妮