政情：預算案文本出錯 印勘誤補鑊
新一份預算案出爐，全城關注本年度政府落墨多少喺房屋及醫療。不過，財政司司長陳茂波製作多時嘅預算案文本竟有出錯，更罕有地印製勘誤「補鑊」，短期土地供應量由原來近一百五十幅，大幅削減一半。消息人士話有關錯誤實屬手民之誤，係喺綜合資料過程中出錯，所以要更正。
誤寫土地供應多咗71幅
演詞第一百三十一段有關房屋用地，原用詞句為「過去兩年，我們透過出售土地、改劃土地用途、發展鐵路物業及市建局項目等措施，增加短期土地供應，『計有一百四十九幅土地，可供興建十萬零八百個單位』。」但正確版本則為「計有七十八幅土地，可供興建約九萬三千個單位」，土地供應量足足減少七十一幅，可建單位量亦大幅減少七千八百個。