立法會工務小組委員會尋日開會討論多項與新界東北發展有關的項目，包括古洞北新發展區及粉嶺北新發展區嘅前地、第一期、餘下地盤平整同基礎設施工程、缸瓦甫警察設施土地平整及基礎建設工程、石湖墟淨水設施同埋古洞北及粉嶺北新發展區項目的特設現金津貼，合共涉款逾三百三十五億元，雖然會議唔係咁多火花，但拗足兩粒鐘仍未獲通過。
議員林卓廷關注受影響居民嘅情況，希望當局可讓居民一次過遷入寶石湖邨，並指現時一戶住戶會分開多間房、多間屋，希望政府嘅分戶政策能夠人性化。另一議員陸頌雄就話，現時政府將分開數期為受影響居民作安置，但有部分居民向佢反映，喺工程展開期間或會導致沙塵滾滾，影響未搬遷居民嘅生活，希望政府可讓居民提早搬遷。
發展局常任秘書長（規劃及地政）甯漢豪回應時話受影響嘅居民約有一千五百戶，而寶石湖邨只有一千戶，但北區仍有其他屋邨，當局意願係希望讓受影響居民原區重置。佢又話地政總署已向受影響嘅住戶發信，希望佢哋盡快回覆表達意願，又話如果住戶中有成年子女均可分戶。
卓妮