政情：房署禁貼反修例海報 尹兆堅死撐只講政策
政府近日擬修訂《逃犯條例》，容許當局與未有和本港簽定引渡協議的地方，以一次性個案方式拘捕及移交逃犯。其中立法會議員尹兆堅尋日話，佢日前想貼出反對有關修訂嘅海報，但被房屋署禁止張貼，話佢呢張海報內容敏感，引起社會矛盾。
尹話原本諗住喺葵青、觀塘等多條屋邨張貼有關海報，向市民解釋事件始末同埋佢反對嘅原因，但一張都貼唔到。
稱符合張貼原則
尹仲話佢前幾日先同房屋署助理署長見過面，商討張貼海報嘅原則，當中講明如果海報唔指名道姓就冇問題，點知過幾日就話海報唔准貼，佢話海報只係講政策問題，符合張貼海報嘅原則，大鬧房署政治審查。
尹又話，所有社會議題都有正反兩面意見，質問係咪支持《逃犯條例》修例嘅海報就貼得，反對就唔貼得？望房屋署有合理解釋。