政情：民政局甩轆西九延長職位被否決

唔夠人投票 響鐘點人數

民政局尋日就喺人事編制小組申請保留三個職位，包括一個首席政府工程師、一個首長級丙級政務官，同一個土木工程拓展署嘅總工程師，以繼續監察西九文化區計劃，任期由四月一日起，為期四年。有鑑於最近港鐵沙中線工程醜聞不斷，不論係建制派定泛民議員尋日喺會上都連番追問當局監督工作。由於當局只有常任秘書長謝凌潔貞出席會議，局長劉江華並唔在場，謝凌潔貞惟有負責「擋箭」，話難以百分百擔保唔會出現工程問題，但冇咗呢幾個位就絕對難作監察。

好不容易應對完議員提問，點知到投票時就唔夠開會法定人數。喺響鐘點算人數後，會議室內建制派議員只有進出口界嘅黃定光同其黨友周浩鼎，民主派議員就只有公民黨（公文袋）郭家麒、譚文豪、楊岳橋。由於當時冇人要求記名投票，最終當局嘅保留職位建議就喺建制派兩票贊成、公文袋三票反對下遭否決。

葉劉質疑黎穎瑜冇拉票

投票結果一出大家都覺得好驚訝，小組委員會主席葉劉淑儀宣布票數時衝口而出一句︰「哦，死喇！」但都挽救唔到局面。佢公布完結果就問政府︰「你哋冇拉票咩？」而佢喺會後仲話，尋日立法會福利事務委員會都開會，唔少議員都要同時出席兩個會議，認為民政局應該派人留意情況，質疑黎穎瑜冇影。

民政局今次甩轆，黎穎瑜就被直接批評唔知去咗邊，但劉江華同樣都係唔見咗人，劉要教訓下屬嘅話，自己都要先檢討吓至得。