中環出更：再有下屬劈炮 鄭若驊眾叛親離
律政司司長鄭若驊「唔告黎智英，放生梁振英」遭全城鬧爆，佢領導嘅律政司內部亦立立亂，接連有人「劈炮」。繼律政司刑事檢控科副刑事檢控專員許紹鼎請辭，將於月底前離職，據了解，擔任鄭嘅政務助理約半年嘅政務官陳可恩，本周初亦已離職，轉投保良局出任副行政總監。查實鄭出任司長略多於一年時間，律政司已有多人離任唔撈，莫非鄭呢位上司真係咁難頂，以致眾叛親離？
政務官任職半年就唔撈
據了解，政務官陳可恩於去年八月調任律政司政務助理，該職位屬首長級第二級官員，月薪最少十七萬元，陳於現職只有約半年時間就離開，令人覺得耐人尋味。消息指，陳將轉換跑道加入慈善團體，於保良局任副行政總監，據報該職位經過公開招聘，主要負責協助行政總監，確保局內日常運作暢順，政策依法規進行。
其實鄭甫上任就捲入屯門獨立屋僭建醜聞，加上多宗案件「應告唔告」，包括大批違法佔中搞手及參與佔中預演嘅人士，至今仍然係逍遙法外，再者律政司嘅檢控政策「亂龍」，亦屢遭外界批評質疑，凡此種種，難免影響律政司內部士氣，或者接二連三有人離任另謀高就，就係為免再次成為輿論風眼所在喇！
卓妮