中環出更：家居監視系統易招黑客 李柏成：信科技不如信人
近年好多人都喺屋企裝閉路電視，既防盜又方便隨時監察家傭或小朋友情況，不過早前外國發生黑客入侵家居閉路電視案件，就引起咗另一個保安問題。博愛醫院副主席李柏成（Jim）話，高科技其實都好危險，尤其係進入5G及人工智能時代，有好多未知嘅破壞力，所以佢就寧願信人，請可靠嘅員工同埋家傭喇。
Jim話佢嘅宗旨係「疑人莫用，用人莫疑」，所以無論係公司員工或家傭全部都係可靠嘅人，好多員工都做咗十幾廿年。佢認為高科技發展神速，黑客可以入侵好多嘢，自保之道係對高科技產品唔好跟得太貼，等人哋用過、試過先，咁就最穩陣喎。
當日係沙田馬場博愛盃賽事，同場仲有善德基金會主席董吳玲玲、總理梁天富、太子珠寶鐘錶主席鄧鉅明及博愛前主席譚姜美珠。董太都係寧願信人，屋企從來唔裝閉路電視，佢話會將工人姐姐當家人看待，所以個個都做咗好長時間，有一位仲做咗廿幾年，另一個就係做做吓話要返鄉下生BB，希望兩三年後再返嚟幫手，董太都一口應承，結果工人姐姐真係三年後再返嚟。
梁天富唔怕被入侵
過去兩年連生兩位小朋友嘅梁天富，今年又將再迎接第三個，真係厲害。佢話屋企有裝閉路電視，科技日新月異，上得網就預咗有機會畀黑客入侵，所以佢裝閉路電視都係影住客廳或門口等唔涉及私隱嘅地方，就算黑客入侵都唔怕喎。譚姜美珠喺澳洲間屋早排接連被爆竊，佢即刻搵保安公司裝閉路電視同埋防盜，不過發生咗黑客事件，睇嚟佢又要搵保安公司睇睇喇。
卓妮