政情：馬時亨資助教大學生海外深造
大學校董會主席唔易做，除咗要領導大學發展，亦要關心學生所需，好似香港教育大學校董會主席馬時亨咁，佢就出錢又出力，資助教大學生到海外留學深造，學生如今學成歸來，就可以春風化雨，貢獻社會。
聯繫有心人 籌學費生活費
馬時亨尋日同校長張仁良去教大宿舍同十一名賽馬會獎學金得獎人茶聚，當中包括兩名教大尖子葉慧儀（Bibi Tayyaba）同梁鈺鈿（Yvette Leung）。巴基斯坦籍嘅Bibi同Yvette先後獲賽馬會慈善信託基金頒發獎學金，令佢哋得以順利完成教育學士學位課程，之後仲有機會到海外留學。
兩位得獎人之所以學有所成，要特別多謝馬時亨，事關兩名學生最初雖有獎學金資助，但仍不足以支付到海外升學嘅學費同生活費，馬時亨知道後，二話不說自掏腰包資助佢哋之外，仲立即聯繫有心人，為佢哋成功籌到足夠學費同生活費，令佢哋最終夢想成真。至於馬時亨資助咗幾多錢，教大話多多少少只係一份心意。