中環出更:斥陳肇始逃避 李國麟促解剖醫管局

香港公營醫療服務爆煲,唔少醫生護士都有返工冇收工,立法會衞生服務界議員李國麟上月已同業界一齊搞過集會,向政府反映問題所在,而佢尋日出席網台節目時就話集會已經過咗幾個星期,可惜食物及衞生局局長陳肇始至今都冇回應,又冇反建議,對陳肇始非常失望,大鬧政府咁耐都冇反應係逃避問題,仲要求「解剖」醫院管理局,睇吓問題出喺邊度?

李國麟喺節目上批評醫管局管治架構臃腫,管理層同前線醫護人員脫節,以為派魚蛋燒賣、潤手霜等幫手打氣,前線人員會受用,但其實前線人員忙到連飯都冇得食,反問政府同醫管局:「係咪要叫病人唔好斷氣住,等我拎咗潤手霜先?」佢仲話雖然舊時有官員巡查時都有「洗太平地」,但舊時係清番乾淨啲用品、地方,依家只係搬走啲病人,情況相差甚遠。

唔知啲錢用咗去邊

佢又話礙於道德包袱,醫生護士好難罷工,所以佢所屬嘅專業議政尋日都聯同醫學界議員陳沛然一齊去信畀特首,要求同特首會面,傾吓點解決醫療服務爆煲問題,佢批評醫管局只加床位唔加人手嘅做法,又強調依家唔係資金問題,而係政府畀咗錢出去,啲錢落唔到去前線人員身上,結果唔知啲錢用咗邊,叫政府一定要監管好醫管局。

卓妮

第一手消息請下載on.cc東網iPhone/iPad/Android/Windows Phone Apps