政情：偷偷返教會 邵家臻諗過做牧師
唔少人細個都寫過「我的志願」，不過唔知有幾多人長大後真係做到？立法會社會福利界議員邵家臻尋日出席一個團拜活動時，講起細個曾經諗過做基督教牧師或傳道人，事關佢中學時期已經信教，非常投入教會事務，一星期七日都會去教會幫手，可惜當時屋企人比較傳統，唔鍾意佢去教會，所以佢惟有呃屋企人出去打機、去玩，然後偷偷哋去教會。
邵家臻話喺中七嗰年，佢所屬教會嘅牧師過咗身，所以佢就想成為牧師，想繼續為教會做多啲事，但後嚟選擇咗讀社工，加埋長大後對教會體制有唔同睇法，決定循社工呢條路繼續奉行自己嘅理念，仲話「牧師、社工、講師」做嘅嘢其實都差唔多，都不外乎「傳道、授業、解惑」啫！
潛移默化 講嘢學足口脗
其實教會對佢嘅影響好大，事關佢話細個有口吃，經常畀同學笑，但喺教會聽道聽得多，潛移默化就學咗牧師講嘢口脗，至今佢無論喺立法會發言或喺大學教書時，都不自覺用咗「牧師口脗」，加上佢成日拎住本筆記簿，就好似牧師拎住《聖經》咁，所以咪有人話佢似牧師囉！